Ewrop: Cynnal ymchwiliad i glwy'r traed a genau

Fe fydd Senedd Ewrop yn trafo effaith clwy'r traed a genau

Yn ôl y disgwyl mae Senedd Ewrop wedi penderfynu cynnal ymchwiliad annibynnol i glwy'r traed a'r genau.

Fe fydd y pwyllgor yn edrych ar sut y gwnaeth gwahanol lywodraethau ymdrin â'r clwy a sut y gellid osgoi argyfwng tebyg eto.

Daw'r penderfyniad wrth i'r pwysau gynyddu ar lywodraeth Prydain hwythau i gynnal ymchwiliad cyhoeddus.

Mae'r alwad yma wedi cael ei gwrthod hyd yma.

Dim grym cyfreithiol

Fe fydd pwyllgor dros dro yn cael ei sefydlu i weld sut y gwnaeth Prydain ymateb i'r clwy.

Fe bleidleisiodd Senedd Ewrop ddydd Mercher o blaid cynnal ymchwiliad ac felly fe fydd pwyllgor o 30 o aelodau o bob plaid yn ystyried y dystiolaeth dros gyfnod o tua 12 mis.

Yr hyn sydd yn allweddol ydy na fydd gan y pwyllgor unrhyw rym cyfreithiol.

Fydd dim modd iddyn nhw felly orfodi neb i roi tystiolaeth.

Fe fydd 'na gwestiynau yn cael eu gofyn a fydd llywodraeth Prydain, drwy'r adran materion gwledig, Defra, yn fodlon rhoi tystiolaeth ger bron y pwyllgor.

Eisoes mae dau ymchwiliad wedi cael eu cynnal ym Mhrydain, yn Nyfnaint a Northumberland.

Hyd yma mae Defra wedi gwrthod rhoi tystiolaeth i'r ddau ymchwiliad yma.

Rhydd o'r clwy

O safbwynt Ewropeaidd, fe fydd y pwyllgor yn edrych, nid yn unig ar y modd y gwnaeth y llywodraeth ym Mhrydain ymdrin a'r clwy yn y wlad ond hefyd yr hyn a ddigwyddodd yng ngweddill Ewrop.

Ac yn amlwg fe fydd y syniad o frechu yn cael ei drafod.

Am bron i flwyddyn fe fu clwy'r traed a'r genau yn ergyd i'r diwydiant amaeth ym Mhrydain.

Yng Nghymru, fe gafodd 118 o achosion eu cadarnhau, a bron i 350,000 eu difa.

Ddydd Mawrth, cafwyd cadarnhad fod yr ardal heintiedig olaf ym Mhrydain, Northumberland, bellach yn rhydd o'r clwy.