Coffau'r rhai fu farw mewn rhyfel

Y Frenhines: Arweiniodd y seremoni yn Llundain

Ledled Cymru mae pobol wedi bod yn coffau'r rhai fu farw mewn rhyfel.

Yng Nghaerdydd ar Sul y Cofio gorymdeithiodd milwyr, bandiau, a chynfilwyr o adeiladau'r Cynulliad ynghanol y ddinas i Gofeb y Rhyfel ym Mharc Cathays.

Ypres

Roedd yr Arglwydd Faer Russell Goodway yn bresennol tra roedd Prif Weinidog y Cynulliad, Rhodri Morgan, mewn gwasanaeth coffa yn Eglwys Gadeiriol Llandaf.

Roedd gwasanaethau coffa mewn nifer o drefi a phentrefi, gan gynnwys Bangor, Porth Tywyn, Cwmbran, Pontypwl a Blaenafon.

Yn Ypres, Gwlad Belg, mae Cymro o Orllewin Cymru'n cael ei goffau.

Penderfynodd y pwyllgor lleol ddarllen bob dydd enw milwr fu farw mewn rhyfel.

Tony Blair: Yn bresennol gyda'i wraig a'i dad

Dydd Sul enw Elwyn Davies o Narberth, Sir Benfro, sy'n cael ei ddarllen.

Bu farw Preifat Davies 84 blynedd yn ôl, pan oedd yn 22 oed.

Yn Llundain Y Frenhines arweiniodd y gwasanaeth coffa.

Am y tro cynta roedd Llysgennad America yn Llundain, William Farrish, yn bresennol.

A gorymdeithiodd Pennaeth Brigad Dân Efrog Newydd, Joe Callan, oroesodd drychineb Canolfan Masnach y Byd, i'r Senotaff gyda dynion tân o Brydain.

Yn ogystal ag aelodau o'r Teulu Brenhinol, roedd y Prif Weinidog, Tony Blair, ei wraig, Cherie, a'i dad, Leo Blair, yn gwylio 10,000 o gynfilwyr yn gorymdeithio.

Ers diwedd y Rhyfel Mawr, mae milwyr Prydain wedi marw mewn 70 o ryfeloedd ac ymgyrchoedd-cadw-heddwch drwy'r byd.