Gwlad Pwyl yn claddu gobeithion Cymru

John Hartson: Dathlu'n rhy gynnar

Cymru 1 Gwlad Pwyl 2

Claddodd Gwlad Pwyl obeithion Cymru yng Nghwpan y Byd ddydd Sadwrn.

Wedi 13 munud sgoriodd Nathan Blake wedi i golgeidwad Gwlad Pwyl Jerzy Dudek fethu.

Yna cafodd Cymru fraw: cliriodd Kit Symons y bêl oddi ar y lein wedi i Kominski drechu golgeidwad Cymru Paul Jones.

Daeth Gwlad Pwyl yn gyfartal pan sgoriodd Emmanuel Olisadebe wedi iddo dderbyn pas o'r agell dde.

Siom

Cafodd y dorf siom pan fethodd Ryan Giggs gyfle euraidd o chwe llath wedi i Nathan Blake dorri ar y dde.

Ychydig o funudau'n ddiweddarach, llwyddodd Giggs i weu drwy'r amddiffyn ond aeth y bêl heibio'r postyn dde.

Yna daeth Cymru o dan bwysau.

Wedi i Kominski saethu bu raid i Jones arbed ddwywaith cyn i Gymru glirio o'r lein.

Adeg yr egwyl roedd y Cymry'n siomedig.

Yna cafodd y Cymry fraw arall.

Camddealltwriaeth

Oherwydd camddealltwriaeth rhwng Andy Melville a Robert Page cafodd Olisadebe gyfle heb ei ail o bedair llath.

Ond arbedodd Jones yn wych.

Yna sgoriodd Gwlad Pwyl.

Daeth eilydd Gwlad Pwyl Kryszalowicz ar y cae a saethu â'i droed chwith.

Funud yn ddiweddarach daeth Cymru o dan fwy o bwysau.

Saethodd Olisadebe ond arbedodd Paul Jones.

Dair munud cyn y diwedd bu raid i Jones arbed yn wych wedi i Olisadebe gyflymu'n sydyn a gwibio drwy'r amddiffyn.

Curo

Cafodd Cymru eu curo gan well dîm yn yr ail hanner.

Yn anffodus, ni chadwodd Cymru feddiant o'r bêl a doedd dim patrwm na disgyblaeth i'w chwarae.

Wrth gwrs, roedd rhai chwaraewyr wedi blino wedi tymor hir ond roedd y dorf yn disgwyl mwy.

Timau

Cymru: Paul Jones, Symons, Melville, Page, Barnard, Savage, Pembridge, Speed, Giggs, Blake, Hartson.

Eilyddion: Matthew Jones, Carl Robinson, Davies, Iwan Roberts, Steve Jenkins, Koumas, Ward.

Gwlad Pwyl: Dudek, Klos, Jacek Bak, Michal Zewlakov, Arkadiusz Bak, Hajto, Kozminski, Iwan, Juskowiak, Zdebel, Olisadebe.

Eilyddion: Hajdan, Rzasa, Marcin Zewlakov, Pater, Kryszalowicz, Kukielka, Krzynowek.

Dyfarnwr: Erol Ersoy (Twrci)