Cae Stadiwm y Mileniwm 'ddim digon da i'r FA'

Mae'n edrych yn debyg bod yna broblem efo to Stadiwm y Mileniwm

Yn ôl Cymdeithas Pêl-droed Lloegr dydy cyflwr presennol cae Stadiwm y Mileniwm ddim digon da i gynnal gêm derfynol Cwpan yr FA.

Bydd trafodaethau rhwng swyddogion y Gymdeithas a rheolwyr Stadiwm y Mileniwm yn parhau bnawn Mawrth ynglyn â sut i wella cyflwr y cae.

Gyda llai na thair wythnos cyn rownd derfynol cwpan yr FA daeth dirprwyaeth o'r Gymdeithas Bêl-droed i Gaerdydd i asesu cyflwr y cae.

Mae yna bryderon fod y gwair wedi'i ddifetha'n ystod rownd derfynol tlws LDV Vans rhwng Port Vale a Brentford yno ddydd Sul.

Mae yna ofnau hefyd fod yna broblem beirianyddol efo'r to ac nad oes modd ei gau.

Er ei bod hi'n glawio'n drwm ddydd Sul cafodd y to ddim ei gau ac mae hynny wedi arwain at adroddiadau fod y to wedi torri.

Niwed i'r ddelwedd

Mae Jon Owen Jones, aelod seneddol Llafur Canol Caerdydd, yn pryderu y gwnaiff hyn niwed i ddelwedd y stadiwm.

Y ffeinal rhwng Lerpwl ac Arsenal eleni fydd y tro cyntaf ers 1922 i rownd derfynol Cwpan yr FA beidio cael ei chwarae yn Wembley.

Fis Mai felly mi fydd llygaid y byd ar Gaerdydd.

Mae wyneb y cae yn y Stadiwm wedi cael ei ail osod unwaith yn barod y tymor yma, ac mae'n edrych yn debyg y bydd yn rhaid gwneud hynny unwaith eto cyn mis Mai.