Castro'n gwrando ar y Manics

17c yr un dalodd y gynulleidfa i weld y Manics

Daeth 5,000 i weld y band o'r Coed Duon - y Manic Street Preachers - yn Hafana, Ciwba, dros y Sul.

Ac ymysg y gynulleidfa roedd yr Arlywydd Castro.

Hwn oedd y tro cyntaf i fand amlwg ganu yn Saesneg yn Ciwba ers y 1970au.

Roedd Fidel Castro yn y gynulleidfa

Dim ond 17 ceiniog dalodd y gynulleidfa am eu tocynnau i'r cyngerdd yn Theatr Karl Marx yn Hafana.

Ac roedd Arlywydd Ciwba, Fidel Castro, yr un mor awyddus â gweddill cefnogwyr y Manics i'w gweld yn perfformio'n fyw.

Bu lleisydd y band James Dean Bradfield yn canu rhai o'u caneuon enwoca ond roedd y gerddoriaeth yn ddiarth i'r mwyafrif o bobol Ciwba.

Ond ynghanol yr adloniant roedd gan y band neges ddifrifol.

Wrth i'r dorf ymateb yn egnïol i'r gerddoriaeth mi ganodd y Manics gân brotest yn erbyn polisi'r Unol Daleithiau tuag at Giwba.

Roedd yn amlwg bod y gynulleidfa'n gwerthfawrogi'r perfformiad - eu blas cyntaf ar gerddoriaeth fyw band o'r Gorllewin ers Billy Joel dros 20 mlynedd yn ôl.

Yn wir, cododd y dorf gyfan ar eu traed - gan gynnwys eu harweinydd - i ddangos eu gwerthfawrogiad o berfformiad y Manics.