Dwy sedd Gymreig yn newid dwylo

Mae map gwleidyddol Cymru wedi newid rywfaint

Mae dwy o seddi Cymru wedi newid dwylo gyda Llafur yn cipio Ynys Môn oddi ar Blaid Cymru tra bod Plaid Cymru wedi ennill Dwyrain Caerfyrddin a Dinefwr oddi ar Lafur.

Ynys Môn oedd y sedd gyntaf ym Mhrydain i newid dwylo wrth i Blaid Cymru golli gafael ar y sedd mae wedi ei dal ers 1987.

Collodd y Dr Alan Williams ei sedd i Blaid Cymru

Albert Owen o'r Blaid Lafur enillodd gyda 11,906 o bleidleisiau, gydag Eilian Williams o Blaid Cymru yn ail gyda 11,106.

Mr Owen yw'r Aelod Seneddol Llafur cyntaf ar yr ynys ers yr Arglwydd Cledwyn.

Ond bu'r canlyniad yn siom aruthrol i Blaid Cymru wrth iddi golli un o'i chadarnleoedd, ac eisoes mae Eilian Williams wedi dweud ei fod yn ystyried herio'r canlyniad oherwydd y dryswch a fu dros bleidleisiau post yn yr etholaeth.

Cafodd siom y Blaid ei lleddfu wrth i Adam Price wireddu breuddwyd y Blaid ers blynyddoedd drwy gipio sedd Dwyrain Caerfyrddin a Dinefwr oddi ar Dr Alan Williams, a hynny o 2,590 o bleidleisiau.

Gweddill Cymru

Ond yng ngweddill Cymru, ni bu newidiadau.

Cadwodd Llafur eu holl seddi eraill, wrth i Blaid Cymru gadw Meirionnydd Nant Conwy, Ceredigion a Chaernarfon, ac fe gadwodd y Democratiaid Rhyddfrydol eu dwy sedd yn Sir Drefaldwyn a Brycheiniog a Chaerfyrddin.

Mae Cymru yn parhau yn wlad ddi-Dori, wrth i'r Blaid Geidwadol fethu ag ennill yr un sedd, er iddynt ddod o fewn ychydig gannoedd o bleidleisiau ym Mrycheiniog a Maesyfed ac ym Mynwy, lle cafodd y pleidleisiau eu hail-gyfrif ddwywaith.

Cynyddodd pleidlais Plaid Cymru mewn llawer o etholaethau yn y de, yn enwedig yn Llanelli, ond ni ddaeth yn agos at ennill y seddi yn y Cymoedd y bu yn ei llygadu yn ystod yr ymgyrch, sef Caerffili, y Rhondda ac Islwyn.

Un o ryfeddodau'r noson oedd y modd y daliodd y bleidlais Lafur i fyny yn gryf mewn etholaethau nad ydynt yn diriogaeth Lafur naturiol, megis Gorllewin Clwyd a Bro Morgannwg, lle llwyddwyd i drechu bygythiad y Ceidwadwyr.

Yng Nghanol Caerdydd, fe fu siom i'r Democratiaid Rhyddfrydol wrth i'r Blaid Lafur ddal ei gafael ar y sedd. Daeth y Democrat Rhyddfrydol o fewn 659 o bleidleisiau i ddisodli Jon Owen Jones mewn sedd y bu gobaith gan y blaid ei chipio.

Yng Ngorllewin Caerdydd, Kevin Brennan, cyn-gynghorydd i Brif Weinidog y Cynulliad, a ddaliodd afael ar sedd ei gyn-gyflogwr, sydd wedi sefyll i lawr er mwyn canolbwyntio ar ei waith yn y Cynulliad.