Prinder ymgeiswyr ethnig

Yn nyddiau olaf yr ymgyrch etholiadol mae pob un o'r pleidiau gwleidyddol yng Nghymru wedi cael eu beirniadu am fethu â denu ymgeiswyr Asiaidd a chroenddu i sefyll ar eu rhan yn yr etholiad.

Mae cynrychiolwyr rhai o gymunedau ethnig Cymru yn dweud bod y gwleidyddion wedi methu â'u gwasanaethu oherwydd eu bod wedi methu denu ymgeiswyr o'u plith i sefyll yn etholiad eleni.

Mae Ali Miraj yn unigryw, ef yw'r ymgeisydd Ceidwadol yn etholaeth Aberafan, a'r unig ymgeisydd o dras Asiaidd trwy Gymru.

Yn ardal Trebiwt, Caerdydd, mae Yvonne Scott yn ddirprwy brifathrawes yn Ysgol Gynradd Mount Stuart.

Dyma ysgol sydd â disgyblion o sawl cymuned wahanol.

Yn eu barn hi, dydi'r holl ymgyrchu etholiadol ddim yn berthnasol i bobol yr ardal honno.

Y broblem fwya meddai yw bod pobl Trebiwt yn teimlo fel bod y gwleidyddion wedi anghofio amdanyn nhw.

Mae Shehzad Malik yn fyfyriwr yn Athrofa Prifysgol Cymru, Caerdydd.

Mae ef yn honni nad y gwleidyddion a'r pleidiau yn unig sydd ar fai am ddiffyg cynrychiolaeth y lleiafrifoedd ethnig yn etholiadau Cymru.

Pleidiau

Ond mae'r pleidiau eu hunain yn cydnabod bod yn rhaid i bethau wella.

Dywedodd y Ceidwadwyr wrth BBC Cymru eu bod yn awyddus i ddenu rhagor o ymgeiswyr o'r cymunedau ethnig.

Dywed Plaid Cymru eu bod nhw'n gweithio gydag arweinwyr y cymunedau er mwyn ceisio mynd i'r afael â'r broblem.

Mae'r Democratiaid Rhyddfrydol yn dweud eu bod wedi ceisio denu ymgeiswyr o'r lleiafrifoedd ethnig i sefyll yng Nghymru, ond eu bod wedi methu.

Mae'r Blaid Lafur wedyn yn honni bod y ffaith nad oes na aelodau croenddu neu Asiaidd yn y Cynulliad yn brawf fod yn rhaid i bob plaid weithio'n galed i ennyn diddordeb pobol o'r lleiafrifoedd ethnig.