Damwain: Gyrrwr lori yn y ddalfa

Roedd y ddamwain yng Ngherrigman ger Amlwch yn oriau mân bore Iau

Mae gyrrwr lori 54 oed o'r Almaen yn y ddalfa wedi i bensiynwraig gael ei lladd mewn damwain ffordd ar Ynys Môn.

Fe fu Rolf Artmann o Dortmund gerbron llys arbennig yn Llangefni fore Sadwrn ar gyhuddiad o achosi marwolaeth drwy yrru'n beryglus.

Roedd yn wynebu cyhuddiadau'n ymwneud ag oriau gyrru a pheiriant tachograph.

Fe gafodd yr achos ei ohirio tan wrandawiad yn Llys y Goron Caernarfon ar Ebrill 4. Doedd dim cais am fechnïaeth.

Fe fu farw Dorothy Thomas, 63 oed o Bengorffwysfa ger Amlwch, yn y ddamwain yng Ngherrigman ger Amlwch yn oriau mân bore Iau.

Roedd ei char Suzuki mewn gwrthdrawiad â'r lori ar yr A5025 am 1.05am.

Mae Heddlu'r Gogledd wedi dweud y dylai unrhyw dystion ffonio 0845 6071001.