Dearbhadh a dhìth air an Urras

Thuirt an t-Urras cuideachd gum feumar tuilleadh fianais air luach na seirbhis a thaobh foghlaim fhaicinn.

Dheadh an t-seirbhis a ruith an com-pàirteachas eadar BBC Alba agus Seirbhis nam Meadhanan Gàidhlig.

A rèir an Urrais, bhitheadh luach ann, ach feumar tuilleadh fiosrachaidh.

Gheibheadh an t-seirbhis - a ghabhadh a-steach telebhisein, rèidio agus an eadar-lìn - maoineachadh luach £18m bhon BhBC agus Seirbhis nam meadhanan Gàidhlig (SMG), agus dheadh 35 uairean a thìde de phrògraman Gàidhlig a chraoladh gach seachdain.

Chuireadh am BBC £2.5m a bharrachd na tha iad a' cosg mar tha air craoladh Gàidhlig ris a' mhaoineachadh.

Tha an t-Urras, a bhios a' cumail sùil air mar a chosgas am BBC airgead a' Chead-chraolaidh, den bheachd gum faodadh gum biodh luach poblach susbainteach an luib na seirbhis.

Co-chomhairleachadh Poblach

Ach, thuirt Urrasair Nàiseanta na h-Alba, Jeremy Peat, gun robh fiosrachadh mionaideach a dhìth air an tairgse a rinneadh.

Tha a-nis gu ruige deireadh na bliadhna aig a' BhBC agus SMG le chèile, gus tuilleadh fianais a thoirt seachad a thaobh nam buanachdan foghlamach agus eile a bhios an luib na seirbhis ùir, mus tig crìoch air a' cho-chomhairleachadh phoblach.

Thèid co-dhùnadh deireanach a dhèanamh san Fhaoilleach, ged a tha SMG, a th' air a mhaoineachadh leis an Riaghaltas, mar-thà air gealltainn gun cuir iad na planaichean an-sàs, fiù 's as aonais a' BhBC.

Na bu thràithe den mhìos seo, cho-dhùin Sgrùdadh Luach Phoblach gum feum an t-seirbhis barrachd a thabhainn dhan phobal, gus sealltainn gu bheil luach an airgid a dh'fheumas cosg air na luib.

RELATED INTERNET LINKS
Sgrùdadh Luach Phoblach Urras a' BhBC (Beurla)
Seirbhis nam Meadhanan Gàidhlig (Gàidhlig)
Ofcom (Beurla)
Telebhisean Didseatach (Beurla)
BBC Alba (Gàidhlig)
The BBC is not responsible for the content of external internet sites