Marina aig caladh Steòrnabhaigh

Dheigheadh am marina ùr a chleachadh le soitheachan nas motha

Tha rannsachadh air sealltainn gu bheil iarrtas ann airson goireasan ùr, a chosgadh mu £2m, aig caladh Steòrnabhaigh.

Mhol e gun deigheadh 40 àite-ceangal a thogail, a dheigheadh an cleachdadh le soithichean suas gu 15m (49tr).

Fhuair an rannsachadh taic airgid bho Ùghdarras Port Steòrnabhaigh, Comhairle nan Eilean Siar agus HIE Innse Gall.

Chaidh an rannsachadh a dhèanamh le Land Use Consultants, Ekos Ltd agus Mott Macdonald.

Thuirt Ceannard Caladh Steòrnabhaigh, an Captainn Torcuil Macleòid, gur e pròiseact tarraingeach a bh' ann:

"Tha taobh siar na h-Alba aithnichte mar fhear de na h-àitean as fheàrr anns a' Roinn Eòrpa airson seòladh agus bheir an leasachadh seo cothrom do chaladh Steòrnabhaigh barrachd bhàtaichean-siùil a thaladh a-steach."

"Tha àrdachadh a' tighinn gach bliadhna air na tha de bhàtaichean-siùil a' tighinn do na h-eileanan agus bidh e comasach dèiligeadh ri feadhainn nas motha ma thèid an caladh a leasachadh".