Connspaid mu fhilm Gàidhlig

Dealbh bhon fhilm Seachd: The Inaccesible Pinnacle.

Tha riochdaire film air a' bhuidheann BAFTA fhàgail seach gun tuirt iad nach tèid am film Gàidhlig aige a chur air adhart airson Oscair.

Tha Crìsdean Young, a rugadh ann an Dùn Èideann, feargach nach eil Seachd: The Inaccessible Pinnacle air ainmeachadh ann an roinn nan cànainean cèine.

Thuirt e gun robh a' bhreith aca "gu follaiseach an aghaidh na Gàidhlig".

Tha am film ag innse sgeulachd bhalaich 's e a' lorg na fìrinn air cùl "sgeulachdan eagalach" a sheanair.

Chaidh seallaidhean an fhilm a tharraing air a' Chuillthionn, san Eilean Sgitheanach.

Dh'innis Mgr Young do BhBC Alba nach d'fhuair e mìneachadh sam bith den adhbhar nach deach am film a chur air adhart.

Thuirt e: "Tha mi a' smaointinn gu bheil e gu follaiseach an aghaidh na Gàidhlig. Tha a' bhreith air a dèanamh an aghaidh filmichean nach eil anns a' Bheurla."

THE INACCESSIBLE PINNACLE 'S e colbh dìreach cloiche a th' ann, a dh'èireas os cionn Sguirr Dheirg a tha 986m (3,234tr). Ann an Seachd, thèid beatha bhalaich òig a ghoid leis a sheanair a tha a' bàsachadh, a' toirt an duine òig don Bhinnean. Thathar a' creidsinn gur e Sgurr Dearg fear de na slighean as cunnartaiche san Eilean Sgitheanach.

Lean Mgr Young: "Tha mi a' smaointinn gu bheil di-tuigse mòr ann. Tha mi a' smaointinn gur e breith aineolach a th'ann".

Thuirt an riochdaire gun tug ainmeachadh airson Oscar cuideachadh do dh'fhilmichean eile ann an cànainean cèine - leithid Ten Canoes agus Apocalypto - a thaobh a bhith a' tarraing luchd-amharc.

Thuirt stiùiriche Seachd - a' chiad fhilm làn-fhaid anns a' Ghàidhlig - Sìm Miller, gun robh e air fhàgail balbh as dèidh mar nach deach am film ainmeachadh.

Thuirt e: "Tha sinn air gu leòr deagh lèirmheasan fhaighinn airson dearbhadh gu bheil sinn air ìre ruigsinn, agus shaoileadh tu gum biodh e freagarrach gu leòr am film a chur air adhart."

Thuirt BAFTA gun robh fo-chomataidh de bhuill na comataidh film aca air na filmichean airson roinn nan cànainean cèine fhaicinn agus tha iad air co-dhùnadh nach bi iad a' cur an fhilm air adhart.

Thuirt an aithris: "As dèidh iarrtas bho riochdaire an fhilm Seachd fhèin, dh'fhosgail a' chomataidh fhilm a' chùis seo a-rithist agus rinn iad deasbad fada mu dheidhinn ach chuir iad romhpa nach cur iad am film air adhart."