Saddam 'yn dal i arteithio ei bobol'

Mae'r Cwrdiaid yn dal i gael eu harteithio yng ngogledd Irac medd Indict

John Stevenson Gohebydd Seneddol BBC Cymru

Mae Saddam Hussein a'i gynghreiriaid yn dal i ladd ac arteithio ei bobol ei hun yn Irac, er bod milwyr Prydain ac America yno'n ceisio'i ddymchwel.

Dyna oedd byrdwn cynhadledd newyddion yn San Steffan fore Gwener gan y mudiad Indict, dan gadeiryddiaeth aelod seneddol Cwm Cynon Ann Clwyd.

Cadeirydd Indict yw aelod seneddol Cwm Cynon Ann Clwyd

Wrth dynnu sylw i'r hyn sy'n digwydd rwan yn Irac, meddai hi, ddylai'r byd ddim anghofio'r hyn sydd wedi digwydd yno ers i Saddam gipio grym.

Pwrpas Indict yw i hel tystiolaeth yn erbyn Saddam Hussein er mwyn dwyn achos cyfreithiol yn ei erbyn am ladd a phoenydio pobol fel y Cwrdiaid yn y gogledd a'r Shiaid yn y de.

Mae'r camdrin yn dal i fynd ymlaen, meddai Indict, ond does dim gobaith gweithredu'n gyfreithiol tra bo'r rhyfel ymlaen.

Ond mae cadeirydd Indict Ann Clwyd yn cefnogi penderfyniad Tony Blair i geisio disodli Saddam trwy ddulliau milwrol

Mae Plaid Cymru wedi annog Ysgrifennydd Cyffredinol y Cenhedloedd Unedig Kofi Annan i drefnu cadoediad er mwyn cael bwyd, dwr a ffisig i bobol Basra yn ogystal â help i bobol mewn trefi eraill sydd wedi cael eu bomio

Beirniadu

Cafodd Ann Clwyd ei beirniadu'n hallt gan rai sy'n anghytuno gyda'i safiad ar y rhyfel.

Ond mae hi'n ddiedifar ac yn herio'r rhai sy'n ei beirniadu

Mae'r pryder ynglýn â thynged pobol gyffredin Irac yn cynyddu gan fod Saddam a'i luoedd yn dal i ormesu a bod pobol eraill mewn gwir beryg o farw o newyn neu o syched.

Un agwedd o'r ymgyrch ydi gweithredu milwrol.