Tri achos arall o'r clwy ar Y Bannau

MI fydd rhwng 2,00 a 4,000 arall yn cael eu difa

Cafwyd tri achos newydd o'r clwy traed a genau ym Mannau Brycheiniog.

Mae 500 o ddefaid a 60 o wartheg yn cael eu difa ar Fferm Park Lodge, Llwyn Du, ger Y Fenni.

Roedd y ddau achos arall mewn defaid ar Y Bannau.

Mae'r cyfanswm yng Nghymru felly wedi codi i 117.

Yn y cyfamser mae'r llywodraeth wedi cyhoeddi y bydd yna dri ymchwiliad cyhoeddus i'r argyfwng clwy traed a genau.

Mae Carwyn Jones, Gweinidog Materion Gwledig y Cynulliad, wedi croesawu'r cyhoeddiad.

Ond yn ôl Elin Jones, cadeirydd Plaid Cymru, mi ddylai fod yna ymchwiliad cyhoeddus i'r argyfwng fel y gall pobol Cymru gymryd rhan yn y broses.

Difa rhagor

Yna y cyfamser cyhoeddodd y Cynulliad y bydd miloedd mwy o ddefaid yn cael eu difa ar Fannau Brycheiniog a'r gwaith yn dechrau ddydd Gwener.

Yn ôl Carwyn Jones dydy'r clwy ddim yn rhemp yn Y Bannau ond ei fod yn ymledu'n araf.

Roedd yn bwysig meddai bod y Cynulliad yn gweithredu ar frys.

Mi fydd rhwng 2,000 a 4,000 yn cael eu difa'n ychwanegol i'r 6,500 sydd eisoes wedi'u difa yno.

Yn dilyn y profi cafwyd tystiolaeth bod y clefyd mewn dwy ddiadell arall sydd â chyfanswm o rhwng 1,000 a 2,000 o ddefaid.

Mi fydd y rhain hefyd yn cael eu difa.