Bom yn lladd 17 yn Jeriwsalem

Aeth dwsinau o ambiwlansys i'r tý pizza

Lladdwyd o leiaf 17 ac anafwyd dros 70 wedi i fom ffrwydro mewn tý pizza ynghanol Jeriwsalem.

Mae'r Jihad Islamaidd wedi cyfaddef mai un ohonyn nhw osododd y bom ac mi gafodd o'i ladd yn y ffrwydriad.

Anafwyd nifer gan wydr yn chwyrlïo drwy'r awyr

Mae Llywodraeth Israel yn ystyried sut i ymateb ac mae disgwyl iddyn nhw ddial ar y Palesteiniaid.

Ar y Lan Orllewinol a Llain Gaza mae swyddogion diogelwch yn gadael eu hadeiladau'n barod am ymosodiad gan yr Israeliaid.

Roedd y bom ffrwydrodd yn Jeriwsalem yn llawn hoelion ac yn un o'r digwyddiadau gwaethaf ers dechrau'r intifada (gwrthryfel).

Dywedodd llefarydd ar ran Jihad Islamaidd bod y bom yn "anrheg mewn ymateb i araith yr Arlywydd Saddam Hussein".

Cyfeirio'r oedd o i araith wnaeth arlywydd Irac ddydd Mercher yn ailadrodd ei gefnogaeth i'r intifada.

Daeth yr ymosodiad ar adeg pan mae'r Palesteiniaid eisiau dial ar yr Israeliaid am dargedu a lladd eu swyddogion yn fwriadol.

Mae Awdurdod y Palesteiniaid wedi rhoi'r bai ar Brif Weinidog Israel Ariel Sharon am ddilyn polisïau llym.

Rhybuddiodd swyddog o Awdurdod y Palesteiniaid bod gweithrediadau Israel yn caledu barn y Palesteiniaid ac yn ei gwneud yn anodd iddyn nhw reoli'r Lan Orllewinol a Llain Gaza.

Roedd y gefnogaeth i Hamas a Jihad Islmaidd ar gynnydd, meddai.